Худжанд қаласы соты “Сонмин Сонбогым” христиан шіркеуінің пасторын экстремизм айыбы үшін үш жылға соттады. Сот үкімі биыл шілде айының соңында шыққан.
42 жастағы Бахром Холматов биыл 10 сәуірде Худжанд қаласында кәрістердің протестанттық шіркеуін тексеруден соң ұсталды. Сол кезде құқыққорғау мекемесі ер кісіні экстремизмге қатысы бар деген күдікпен ұстағанын хабарлаған.
Сот өкілдерімен және сотталушының туыстарымен хабарласу мүмкін болмады. Бұның алдында “Форум-18” сайты Холматов туыстары сот ісіне қатысты пікір білдіргісі келмейтінін жазған. Шіркеуге келушілер де қуғындалудан қорқып отыр.
Тәжікстан билігінің мәліметі бойынша, “Сонмин Сонбогым” христиан шіркеуінің ресми тіркеуі жоқ, сол себепті оның ел аумағындағы қызметі заңсыз саналады. Дегенмен кәріс шіркеуінің сайтында “Сонмин Сонбогым” орталығы 2009 жылы Тәжікстанның Дін істері жөніндегі комитетінде тіркеуден өткені туралы жазылған.