Қымбатшылық жалға берілетін пәтерлерге де жеткен. Бір бөлмелі баспананы бір айға жалдау 3 миллион теңгеге дейін өскен. Кәсіпкерлер бағаны барынша көтеріп, мол табыс табуға тырысып бағуда. Ал мұндай маусымдық қымбатшылыққа ешкім шектеу қоя алмайды. Бағаны нарық реттейді.
“Келіп жатқандардың көбісі шелдіктер. 5 жұлдызды ең қымбат нөмердің бағасы 1 млн 400 мың, ең арзаны 30-40 мың шамасында”, – дейді «Астана конвенш бюро» ЖШС менеджері Марат Әлмағамбетов.
Астаналық шенеуніктер кәсіпкерлердің баға саясатына араласпаймыз деп отыр. Тек әкімдікпен арнайы келісімге отырған қонақүйлерге шектеу бар. Оларға халықаралық көрме кезінде қызмет құнын 20 пайызға дейін өсіруіне рұқсат. Мәселен, Есілдің сол жағалауында орналасқан қонақүйдің иесі жөндеу жасап, қонақтарды күтіп алуға қызу дайындалуда.
“Бұрын бір нөмер тәулігіне 15 мың болған. Қазір 18 мыңға көтердік. Маусым айына орын жоқ. Шілде, тамызда да адам көп болады деп отырмыз”, – дейді қонақүй директоры Сергей Федосеев.
Астанада жалға берілетін пәтерлердің бағасы да шарықтап тұр. Маусым айынан бастап сұраныс күрт өскен. Сәйкесінше, үй иелері баспана құнын көтеріпті. Қазір риэлторлар тапсырыс берушілерді жайғастырып үлгере алмауда.
“ЭКСПО-ға байланысты пәтер бағасы екі есеге қымбаттады. Астанада бір бөлмелі баспананы 150 мыңға, екі бөлмеліні 300-350 мыңға жалдауға болады. Әзірге бос пәтерлер бар. Бірақ, сұранас та өте жоғары”, – деді пәтерді жалға беру бойынша менеджер Малика Тойшытаева.