“Келін” фильміне түсіп танымал болған актриса Гүлшарат Жұбаева 8 баланы дүниеге әкелген жалғызбасты ананы сынап тастады. Айтуынша, жағдайын түзеп алмай топырлатып туа бергені дұрыс болмаған.
Бұл туралы ол өзінің Facebook – тегі парақшасында жазыпты деп хабарлайды nur.kz.
“Қазір ғана 8 баласы бар әйелге қолымнан келгенше азық-түлік апарып қайттым. Ана балапандардың қандай жерде тұрып жатқанына қарап тұру мүмкін емес. “Елім, жұртым өлтірмейді” дейді. Бұл ой қаншалықты дұрыс? Басында үйі, жағдайы жоқ адамның 8 балаға жеткенше мемлекетке сеніп, туа беруі, меніңше, дұрыс емес. Сондағы 8 балаға алатын бір айлық жәрдемақы – 8 мың теңге”, – деп күйінеді актриса.
“Алланың бергені дейміз. Халық көмектесіп, біраз адам қол ұшын созып та жатыр. Бірақ, сыз баскан үйде балапандары күнде ауырады. Қабырғалары тесік, жары құлап қалайын деп тұр. Қара жерге кілем төсей салған. Барлық жер ызғар, балшық. От жағып жылытады екен. Қарды ерітіп, суын ішеді”, – деген Гүлшарат Жұбаева баланың саны емес, сапасына мән берген дұрыс деп есептейді.
“Көзін ашқаннан дұрыс тамақ ішпей, бүтін киім кимей, көк жөтелмен алысады. Сапалы білім алмай өскені қаншалықты дұрыс? Табалайын деген ойым жоқ. Тек Алланың берген балапандарына қиянат істемей, “сапалы” балаларды өсіруіміз керек. Балапандар тірі жан ғой, олар да, басқа балалар сияқты қалағанын жеп, толыққанды өсуі керек. Өскенде ауру, білімсіз, саны көп азамат болғаны кімге қажет? Саны емес сапасына мән берсе екен аналар. Мен ойланбайтын анасын, әкесін емес, балаларды аяймын”,- дейді ол.