Павлодарда күндізгі стационарда ем-дом қабылдап жүрген жас жігіт ауруханада қайтыс болды. 24 жастағы Асхат Сүйішпаевтың туыстары бұған ақхалаттыларды кінәлап отыр. Өйткені олар демікпесі басталған жігітке алғашқы көмек беріп үлгермедік депті.
Бұл туралы КТК арнасы хабарлайды.
Асхат Сүйішпаев кішкентай кезінде демікпе дертіне шалдыққан. Сондықтан денсаулығын жіті назарда ұстапты. Ал осыдан тура бір жұма бұрын туыстарына жоспарлы ем-дом қабылдап жатырмын деп хабарлама жазып, тіпті суретін де салған. Бірер сәттен соң ақхалаттылар оның қайтыс болғаны жөнінде суық хабарды жеткізіпті.
“Ватсап бойынша екеуміз жазысып, 10:15-те ол маған суретін жіберді. Система алып жатырмын деген. Дәрігерлер екі сөйлеп отыр. Шындықты тапқымыз келеді. Дәрігерлер неге өтірік айтады?”, деді марқұмның ағасы.
Марқұмның туыстары тамыр арқылы инфузия кезінде науқастың жағдайын ешкім бақыламағанына сенімді. Әйтпегенде, оны құтқарып қалу мүмкін болар еді дейді олар. Қазір облыстық денсаулық сақтау департаментінің үстінен прокуратураға шағым түсірген. Бұл жайтқа қатысты сот-медициналық сараптама жүргізіліп жатыр. Ақхалаттылар болса, науқасты құтқарып қалу үшін қолдан келгенді жасадық дейді.
“Ем-дом жасалып жатқанда науқастың жағдайы нашарлап кеткен. Бірден емдеуші дәрігері мен бөлім басшысы жетіп, тиісті көмекті жасаған. Дегенмен, науқас өліп кеткен”, деді №3 аурухана бас дәрігерінің орынбасары.
https://kaz.365info.kz/astanada-zhurnalist-kelinshekti-yryp-oltirgen-kydikti-ystaldy-333841
Бұған дейін науқас ургенттік ауруханалардың біріне түскен. Кейін қолхат жазып, үйіне кетіп қалыпты. Қазір бұл жайтқа қатысты тәуелсіз сарапшылар ауруханада тексеріс бастаған.
24 жастағы Асхат Сүйішпаевтың артында жалғыз анасы мен інісі қалды. Жас жігітттің өзі банктердің бірінде жетекшілік қызметте болғанын айта кетейік. Жуырда ғана сүйіктісіне сөз салып, отбасын құруды жоспарлап жүріпті.