Сот бұрынғы ұлттық экономика министрін тұтқындауға санкция берді.
Бұрынғы ұлттық экономика министрі Қуандық Бишімбаевқа қатысты бұлтартпас шарасы қабылданғаны туралы Сыбайлас жемқорлыққа қарсы күрес ұлттық бюросына сілтеме жасаған «ҚазАқпарат» хабарлады.
«12 қаңтар күні Астана қ. Алматы ауданының №2 аудандық соты Қуандық Бишімбаевқа қатысты «тұтқындау» бұлтартпау шарасын тағайындады. Бишімбаев топтармен алдын ала келісіп, бірнеше рет ірі көлемде пара алды деп айыпталуда. Сотқа дейінгі тергеу жұмыстары жалғасуда», – делінген хабарламада.
Қуандық Бишімбаевтың орнына Қазақстан Республикасының жаңа Ұлттық экономика министрі болып Тимур Сүлейменов тағайындалды.
Елбасы Нұрсұлтан Назарбаев еліміздің сыртқы істер министрлігінің басшылық құрамымен кездесу кезінде ұлттық экономика министрлігінде болып жатқан кадрлық ауыс-түйіс туралы айтты.
«Министр Қуандық Бишімбаев «Бәйтерек» холдингіндегі қызметіне қатысты туындаған мәселелерге байланысты орнынан босады. Қазіргі сәтте оған қатысты тергеу шаралары жүріп жатыр», – деді Мемлекет басшысы.