Ninety One тобы отандық шоу бизнесте өнер көрсете бастағалы оларды сынағандар да, сахнаға шығармай өзегінен тепкендер саны да өте көп. Жақында бұл топқа екі жыл толса да, артынан ерген сындар мен жағымсыз пікірлер толастамақ емес.
Бұл жолы YouTube желісінде таралған Тұрсынбек Қабатовтың әзілі сынға қалды. Тағы да шу шығарып, жағымсыз пікірлерін қарша боратып жатқан топ жігіттері емес, иглздар.
“Күтпеген жерден 91 тобының кешіне барып қалдым. Ана жердегі жастардың көздерін көрсеңіздер ғой, құдды бір тоқсан бірінші жылы тәуелсіздік алғандай ғой. Ана 91 тобының әнінде дәм жоқ. “Айыптама мені” деп айқайлап жатыр. Далада кешке кіре алмаған үш жүз қыз атасының бейітіне кіре алмай қалғандай жылап жүр”,- дейді Қабатов.
“Мен тәуелсіздіктің 25 жылдығына орай Конгресс – холлда 25 жылға 25 дәстүрлі әнге арналған керемет ән кеші болды. Сол кешке мені қонаққа шақырды. Сол жастарды жаңағы концертке әкелді ғой. Бір сыныптың оқушыларын бір қатарға отырғызып, ана балалар шығып кетпес үшін екі басына екі мұғалімді қаратып қойыпты. Балалардың түрлеріне қарасаңыз көңілдері толмай отырғаны білінеді. Ана екі мұғалімнің үстінен мектептің директоры, мектеп директорының үстінен департамент директоры қарап отыр. Біздің патриоттық әндерге деген тәуелсіздік жастарының қызығушылығы жоқ”,- деді ол.
Видеоны көрген топ жанкүйерлері Тұрсынбектің сөзін сынға алып, мешітте туған күн тойлаған Қарақатты неге айтпайсыз деді.
“Тұрсынбек кімге әлі келеді, соны келемеждейді. Сын айтса өнер жұлдыздары көп қой. Мысалы, Қарақаттың мешітте жын ойнақ жасағаны, жас қыздардың үйлі -баранды еркекке тоқал болуы”, “Сіз сол дәрежеге жетіп алыңыз”, ” 91-дің əндерін тыңдап көп жасөспірімдер қазақ тілінде сөйлеуді бастады, тіпті шетелдік тыңдармандарыда қазақ əндеріне қызығып жатыр, елімізде музыканы дамытып жаңа бағытта жұмыс жасап жатқан топ қой. Олардың шашында да киімінде де тұрған ештеңе жоқ”,- деп жазған желі қолданушылары.
Ал сіздің бұған деген ойыңыз қандай?