Жалын 80 шаршы метр аумақты шарпыған. Өрттің неден шыққаны қазір анықталып жатыр.
Өскеменде жер үйден өрт шығып, салдарынан үш адам қаза тапты. Тілсіз жаудан көз жұмғандардың арасында жеті жасар қыз да бар. Тек бір әйел ғана аман қалған, деп хабарлайды Baq.kz.
«Өрт түнгі сағат екіде тұтанған. Октябрьская көшесінде орналасқан жер үйден өрт шыққан. Куәгерлердің шақыртуымен оқиға орнына жеткен өрт сөндірушілер дәліз бен бір бөлменің жанып жатқанын көреді. Өрт сөндірушілер келген кезде тілсіз жау бүкіл үйді шарпыған», – деп мәлімдеді Өскемен төтенше жағдайлар басқармасының баспасөз хатшысы Марина Лискова.
Ал 32 жастағы әйел, қаза тапқан қыздың анасы жедел жәрдеммен қалалық ауруханаға жеткізілді.
Жалын 80 шаршы метр аумақты шарпыған. Өрттің неден шыққаны қазір анықталып жатыр: әдейі өрт қою, электр жабдықтары мен пешті пайдалану кезінде қауіпсіздік ережелерін сақтамау секілді бірнеше нұсқа қарастырылуда.