Шымкенттік бас полицей елді алдай ма?
Шымкент қалалық жергілікті полиция қызметінің басшысы Данияр Мейірхан бір жылдық жұмысына есеп берді.
Ел арасында «пиаршы полицей» деген атақ алған жас подполковниктің жиынына келген жұрттың жартысы мәжіліс залына сыймай, сыртта қалды. Әлеуметтік желілер арқылы жұмысын жиі жарнамалайтын шендіге халық уәжін жеткізді.
Ашылғанына бір жыл болған мекеменің басшысы осы уақыт ішінде қылмыстың барлық түрі күрт азайғанын айтып мақтанды. Сандарды сөйлеткен бас полицей елді полицияға деген көзқарасты өзгертуге шақырды.
— Полиция имиджін көтеру үшін талай тірлік жасалды. Біз халық үшін ашықпыз. Әлеуметтік желілер арқылы мыңдаған шағымдар алып, жұмыс істеліп жатыр. Бейнекамералар мен арнайы қондырғылардың да көмегі көп. Біз қол жеткізген жетістік жетерлік. Полицияға деген көзқарасымызды өзгертейік, сонда полиция да өзгереді, — деп түйіндеді өз сөзін Данияр Мейірхан.
Алайда республикалық газет тілшісінің қойған тұрғындардан түскен сұрақтарынан кейін Мейірхан мырзадан маза қашты.
«Жақында жергілікті телеарна тілшілерімен рейд жүргізіп, құқық бұзған азаматты ұстадыңыз. Бірақ оның өз танысыңыз екені жайлы ақпаратқа не дейсіз?»,
деп сұрады журналист.
Осыдан кейін Данияр Мейірхан бұл оқиғаның көзбояушылық емес екенін айтып ақталды. Тәртіп сақшысы бұзақыға қатысты іс полиция қарауында екенін айтумен шектелді.
Халық уәжіне уақыт жетпей, жұрт арыз-шағымдарын жазбаша түрде бас полицейге өткізді.
050013, ҚР, Алматы қ., «Керемет» ықшамауданы, 7 үй, 39 корпус, 472 кеңсе