Шымкентте аргентиналық футболшыны тонап кетіпті
Шымкенте “Ордабасы” футбол командасының легионер ойыншысын тонап кетті.
Оңтүстіктің атақты футбол тобына қосылған Пабло Фонтанельоны үй күтушісі сан соқтырып кеткен. Шымкентке көшіп келген шетелдік футболшы қала орталығында отбасымен бірге пәтер жалдап тұрған екен.
Негізгі жапа шегуші – 33 жастағы легионер ойыншының əйелі. Сотта белгілі болғандай, шабуылшының үйінен қымбат бағалы алтын бұйымы із-түссіз жоғалып кеткен екен. Алтын əшекейдің қолды болғанын түсінген шетелдік отбасы көп ойланбастан полицияға шағымданады.
Тәртіп сақшылары күдікті ретінде үй күтушісін тергеуге алған. Іс насырға шапқанын түсінген əйел, алтынды ұрлағанын мойындапты. Алайда ол уақытта үй күтушісі “олжасын” ломбардқа өткізіп үлгерген екен. Шетелдік мейманның алдында ұлтқа қалған төрт балалы ана сотта қожайынынан кешірім сұрап, қатыгездік танытпауын өтініпті.
Іс Əл-Фараби аудандық сотының төрағасы Маратəлі Бекназаровтың қарауында өтті. Үй шаруаларымен айналысуға жалданған ұры əйелдің көз жасы аргентиналық футболшыны жібіткен. Шымкентке жаңадан қоныс аударған футболшы отбасы оған кешірім берді.
Шымкенттік клуб бұл аргентиналық футболшыны 1,800,000 еуроға сатып алып, онымен 2019 жылдың 31 желтоқсанына дейін келісімшарт жасасқан.
050013, ҚР, Алматы қ., «Керемет» ықшамауданы, 7 үй, 39 корпус, 472 кеңсе