Шығыс Қазақстан облысы Абай ауданының әкімі қолайсыз ауа-райының орын алуына байланысты өңірде төтенше жағдай жариялады.
Қар аралас жаңбыр жауып, күн райы аяздап, борандап тұрғандықтан Абай ауданының Саржал ауыл округінің аймағында табиғи сипаттағы төтенше жағдай жарияланды, деп хабарлады дүйсенбіде Шығыс Қазақстан облысының төтенше жағдайлар департаментінің баспасөз қызметі.
“Қараша айында ауа-райы күрт өзгерген. Биіктігі 50 сантиметрге жеткен қалың қар үстіне жаңбыр жауды, кейіннен аяз болып соңы бұрқасынға айналды. Саржал ауылдық округіне қарасты шаруа қожалықтарында тұрғындардың өмір сүру жағдайы қиындап кеткен. Саржал ауылдық округіне қарасты шаруа қожалықтарының барлық бағыттары бойынша жолдарды қар басып қалған”, — деп хабарлады Sputnik-ке төтенше жағдайлар департаментінде.