Шетелдіктер есірген. Алматының қақ ортасынан Корей азаматы секс-притон ашып алған

13 қантар 2017, 16:30

199

Корей азаматы Алматының қақ ортасында шетелдіктерге қызмет көрсететін секс-притон ашып алған.

Бұл туралы Алматы қалалық ішкі істер департаментінің баспасөз қызметі хабарлады.

Жалға алынған жеке үйді жезөкшелердің ордасына айналдырған адам Оңтүстік Кореяның 47 жастағы азаматы болып шықты. Ол фирма директоры екен. Полицейлердің айтуынша, ол бастапқыда үйді караоке-бар ретінде ашқан. Бұл мақсатта күдікті қаланың қақ ортасында зәулім үй жалдап, сенімді адамдарынан құралған көмекшілерін жұмысқа қабылдаған. Бұл “барда” тек шетелдіктерге қызмет көрсетілген. Ақысы да шетел валютасында төленіпті.

“Корей азаматы Қазақстан азаматтарынан құралған тобымен өте сақ әрекет қылған. Әр адамның өз рөлі болған. Мәселен, Алматы облысының 45 жастағы тұрғыны фирма директоры ретінде тіркеліп, персоналдың жалақысын төлеумен айналысқан, сонымен қатар, ЖШС-ның заң және қаржы мәселелерін шешкен. Ал Жамбыл облысының 51 жастағы тумасы “караоке-барда” күзетші болыпты. Ол мекемені күзетіп, тек танитын адамдарды кіргізген. Бұл қылмыстық ортада 29 жастағы әйел бардың әкімшісі ретінде жазылғанымен, ол нақтысында интим қызметін ұсынатындардың кастингін өткізген.

Мекеменің ішінде ол әйелді “мадам” деп атаған. 20 жастағы тағы бір бойжеткен мекеменің касса қызметінде жұмыс істеген. Жедел және арнайы шараларды жүргізудің қорытындысында түскен мәлімет бойынша, ол клиенттерден ақша жинап отырған. Жеңіл жүрісті қыздардың қызмет көрсету бағасы – 100-300 доллар аралығында”, – деп хабарлады Алматы қалалық ішкі істер департаментінің ұйымдасқан қылмыстық топпен күрес басқармасының басшысы Ерлан Оралбеков.

Осы дерек бойынша ҚР Қылмыстық кодексінің 309-бабының 2-бөлігі бойынша Алматы қалалық ішкі істер департаментінің тергеу басқармасы тергеу жүргізіп жатыр. Оңтүстік Корея азаматы Қылмыстық кодекстің 128-бабы бойынша уақытша ұстау изоляторына қамалды.