Өткен түні сағат 23:05-те түскен дабыл белгісінен кейін Қазақстан Республикасы ҰҚК Шекара қызметінің Жаркент шекара отряды мен соған қарасты «Қорғас», онымен көршілес «Басқұншы», «Ынталы» заставалары түн ауғанша тынымсыз жұмыс жасады.
ҚР ҰҚК ШҚ баспасөз қызметінің айтуынша, сағат түнгі 01:42-де оң қапталдағы «Басқұншы» шекара заставасы бастығының орынбасары бастаған төрт шекарашы сарбаз «Ром» атты қызметтік иттің көмегімен ішке қарай 5200 метрге кіріп үлгерген «шақырылмаған қонақты» ұстады.
Ұсталған адам қытай тілінде ғана сөйлейді. Жолқапшығынан 1990 жылы туған ҚХР азаматының төлқұжаты, 3 дана газды оттық, азық-түлік қоры табылды.