Семей тұрғыны интернетте жалған ақпарат жазғаны үшін сотталды

Бейнежазба үшін жаза! Семейде үй құлады деп жалған ақпарат таратқан Артем Полюх ғаламторға жүктеген бейнежазбасы үшін 2 жыл 6 айға шартты түрде бас бостандығынан айырылды. Енді ол құқық қорғау орындарының қатаң бақылауында болады, деп хабарлайды КТК арнасы.

Судья оның 2-ші топтағы мүгедек және кәмелет жасқа толмаған баласы барын ескергендіктен, шартты жазаға кесті. Ал Артем Полюхтың өзі елді дүрліктірген  бейнежазба ватсап арқылы келді деп ақталумен болды. Айтуынша, оған көршілес Ресейде болған оқыс оқиғаның видеосын достары жіберген көрінеді. Онда «бүгін Семейде көпқабатты үй құлады» делінген. Ал құрдастарына сеніп қалған азамат, бірден ғаламтордағы жеке парақшасына жүктеп үлгерген. Осылайша мұны көрген ғаламтор қолданушылары жалған ақпаратты жарыса таратып жіберіпті. Айта кетейік, бұл жағдай биыл мамыр айында болған.