Бірнеше ота жасалғаннан кейін Қарағандыдағы зорланған 5 жасар қыз ауруханадан шығарылды,-деп жазды Қазақпарат.
Барлық дәрігерлер мен облыстық аурухана қызметкерлеріне алғыс айтамын. Қызды емдеу кезінде қолдап, көмек қолын созған барлық жанға ризамыз»,-деді Қарағанды облысы бойынша іскер әйелдер кеңесінің төрайымы Әлия Садырбаева.
Есте болса, 23 шілде күні полицияға 40 жастағы ер адам хабарласып, балалар алаңындағы қызының жоғалып кеткенін айтқан.
Сол күні кешкісін жергілікті полиция 50 жастағы тұрғынның пәтерінен зорланған қызды тапқан еді. Күдікті бірден тергеу абақтысына жөнелтілді.
Ол қызды пәтеріне алдап шақырып алғанын, арам ойын жүзеге асырғанын мойындаған.
Күдіктінің сөздерінен кейін полиция күзетшісі оны жыныс мүшесі тұсынан тепкілеп, ұрып тастаған. Бұл жағдай видеоға түсірілгендіктен әлеуметтік желілерде тарап кеткен болатын. Полиция сержантының үстінен осы әрекетіне байланысты Қылмыстық кодекстің 362 бабы (қызметін асыра пайдалану) бойынша іс қозғалған еді. Тергеу барысында осындай жағдай орын алғандықтан істің тергеушісі де ауыстырылған.
Прокуратура 26 шілде күні полиция қызметкерін кепілмен бостандыққа шығарды. Ол енді кешкі уақытта үйінен шықпайды, қаладан шығуға болмайды. Ол тұратын ауданда қандай да бір келеңсіздік болса бірінші болып тергеледі. Осындай қатаң талаптар орындалмаған жағдайда оның туыстары кепілге қойған зат бірден қазына қоржынына өтеді.