Стамбул прокуратурасының өкілі Reina түнгі клубында теракт жасаған Абдулқадыр Машариповке 40 өмірлік жаза мен 2397 жыл түрме жазасын сұрады, деп хабарлады Sabah түрік басылым. Бұған дейін Машарипов соттан өзін өлім жазасына кесуін сұраған еді, бірақ Түркияда өлім жазасына тыйым салынған.
Машариповті “конституциялық құрылымды құлатуға талпынды”, террорлық акт жасады, көптеген адамды өлтірді, қаруды заңсыз сақтады деп айыптады.
Машарипов бірнеше аптадан соң Стамбулдың Эсенюрт ауданында ұсталды. Оның пәтерінен екі тапанша, 197 мың доллар, дрон және SIM-карталар табылған. Түрік полициясының мәліметі бойынша, бұл қаражатты Машариповке Стамбулдағы шабуыл үшін төлеген болуы керек.