Павлодар облысында өзін спутниктік табақшаны қойып, оны реттеуші маманмын деп таныстырған алаяқ ұсталды.
Павлодар облысында Шығыс Қазақстан облысының 23 жасар тұрғыны ұсталды, ол алаяқтық жасады деген күдікке ілініп отыр деп хабарлады өңірдің ішкі істер департаментінің баспасөз қызметі.
Ауылға жолаушылар автобусымен жеткен жас жігіт бірінші кездескен үйге кірген. Үй иелеріне ол өзін “Космос плюс” компаниясының қызметкерімін деп таныстырған. Сөйтіп ол ертеңнен бастап бүкіл спутниктік арналардың жұмыс істемейтінін мәлімдеген. Сондықтан спутниктік табақшаны қайтадан реттеп, ондағы арналарды жаңадан орнату қажет дейді. Осы қызметі үшін ол ауыл тұрғындарынан 7 мың теңге алады. Теледидардың пультін алған алаяқ антенна мәзірін ашып, бірдеңе баптап жатқандай кейіп танытады. Ақшаны алған соң күдікті тағы екі үйге бас сұғып, алаяқтығымен тағы да табыс табады.
Алайда алданып қалған әйелдердің бірі күдіктеніп, бірден полиция бөлімшесінің инспекторына хабар береді. Бұл дерек бойынша ҚР Қылмыстық кодексінің 190-бабы, яғни “Алаяқтық” бойынша сот алды тергеу жұмыстары жүргізілуде. Ақшалай қаражат иелеріне қайтарылды.