Қарсы бағытқа шығып кетіп, балалар отырған автобусқа еріп келе жатқан полицей көлігіне соқтығысқан КамАЗ жүргізушісі ұсталды.
КамАЗ жүргізушісі ішпеген, – деп хабарлайды Tengrinews.kz.
“Қазір тергеу шаралары жүріп жатыр. Одан сұрау алынып жатыр”, – дейді Павлодар облысы ІІД өкілдері.
Еске салайық, оқиға кеше болған. Баянауыл аудандық ішкі істер бөлімі полициясының қызметкерлері қызметтік Lada Granta көлігімен балалар отырған автобусты алып келе жатқан. Балалар Павлодардағы шаңғы жарысына қатысуға бара жатқан. Кенет Павлодар-Астана автожолында Қалқаман ауылының маңында КамАЗ жүргізіп келе жатқан 50 жастағы жүргізуші қарсы бағыттағы жолға шығып кеткен. Жүк көлігі мен балалар отырған автобус соғыспауы үшін полиция старшинасы Мұрат Нұрсейітов ойланбастан қызметтік көлікті жолға көлденең бұрып үлгерген.
Осыдан кейін автобусқа қарай келе жатқан КамАЗ полиция көлігін соққан. Жол апатының салдарынан полицей түрлі жарақатымен Павлодардағы ауруханаға жеткізілген. Автобуста 18 бала және оларды алып келе жатқан төрт тәрбиеші болған. Қазіргі уақытта 39 жастағы полицей жансақтау бөлімінде жатыр.