Павлодар тұрғындары мектепке барабан өткізіп жатыр

ҚР Білім және ғылым министрлігінің бастамасымен 1-маусым күні еліміздің барлық өңірінде балалар және жастар музыкалық ансамбльдерінің шеруі өтеді.

Осыған орай облыстық білім беру басқармасы облыс тұрғындарын барабан жинауға көмектесуді сұрады, деп хабарлайды Рavlodarnews.kz.

Облыстық білім беру басқармасы басшысының орынбасары Ернұр Дәуеновтің айтуынша, тұрғындардың барабандарды Павлодар қаласындағы Катаев атындағы оқушылар сарайына әкеліп тапсыруына болады. Ал, шеру 1-маусым күні орталық алаңда өтеді.

– Біздің өтінішімізге құлақ асып, көмек көрсетем деген тұрғындар болса, барабандарды Катаев атындағы облыстық оқушылар сарайына әкеліп берулеріңізге болады. Біз барабанның қандай түрі болса да қуана қабылдаймыз. Мәселен, екі жақтысын немесе біржақтысын, ескісін де, жаңасын да қабылдай береміз. Тұрғындардың бұл сыйлығы біздің талантты оқушыларымыз үшін маңызды. Олар шеруде осы аспаптарда ойнайтын болады, – дейді Ернұр Дәуенов.