Өзін-өзі тонамақ болғандардың өтірігі әшкереленді

Жеке компанияда жұмыс істейтін 38 жастағы жүргізуші-экспедитор оңай олжаға кенелмек болып  алдын ала жоспар құрыпты. Екі танысымен бірге шұжық пен ірімшік саудасынан түскен 5 миллион теңгені қалтаға баспақ болады. Осы мақсатта «қарулы қарақшылар жолда тап берді» деп полицияға қоңырау шалған. Жағдайды жан-жақты тексерген жедел іздестіру тобы экспедитордың өз жауабынан өзі шатасып тұрғанын байқап қалыпты. Осылайша әшкере болған үшеудің үстінен іс қозғалып, сот шешімімен үй қамаққа алынды.

“Танысымның ұсынысы ұнап кетті. 5 миллионды тең бөліп алмақшы болдық. Үшеуміз бірнеше рет кездесіп ақылдастық.Павлодарға апарған тауардың ақшасын алып келуге шыққанымды айтып, Астанада кездестік. Қазір осы ісіме өкініп отырмын”, деді күдікті.