Берілген есепте дәрі-дәрмекпен қамсыздандыруға бюджеттен ақша бөлінген, алайда оның науқасқа жетіп жатқаны шамалы.
Бұл туралы informburo.kz хабарлады.
Шығыс Қазақстан облысында өткен қоғамдық тыңдалымда медицина саласына бюджеттен миллиардтап ақша бөлініп жатса да дәрі-дәрмек жетіспеуішілігі мәселесі өзекті екені анықталды. Тіпті, облыстық депутаттардың өзі тегін дәріге қол жеткізе алмай отыр екен.
“Басқасын айтпағанда, мысалы диабеттен ауыратындарды алайықшы.
Мен өзім бір ай ғана тегін дәрі алдым, ал қалған кездері өз қалтамнан ақша шығарып сатып алдым. Ал сонда сол дәрі, оған бөлінген ақша қайда кетті?
Адамдар өзіне тиесілі тегін дәріні ала алмай отыр. Қайда олар? Ақша қайда кетіп жатыр, бөлінді ғой” – деді облыс мәслихатының депутаты Олег Чернышов.
Өкінішке қарай, жиында облыстық денсаулық сақтау басқармасының өкілдері болмаған.Бірақ өңірдің қаржы басқармасы бастығының орынбасары бұл мақсатқа бюджеттен ақша уақытында бөлінгенін жеткізді.
“Кепілдендірілген медициналық көмек үшін 38,5 млрд теңге бөлінді. Оған қоса тегін берілетін дәрі-дәрмектер үшін 10,6 млрд теңге жұмсалды. Соның арқасында қант диабетімен, обырмен, қан ауруымен, Вич жұқтырғандар тегін дәрі-дәрмекпен қамсыздандырылды”, – деді ШҚО Қаржы басқармасы бастығының орынбасары Галина Пахомова.