Өскеменде Орталық Азия тасбақалары заңсыз сатылған

Өскеменде полицейлер зоодүкендегі Орталық Азия тасбақаларының заңсыз сатылымының жолын кесті. Бұл туралы ІІМ-нің ақпараттық медиа-порталы хабарлайды. Ведомство мәліметінше, полицияға жергілікті тұрғыннан үй жануарлары дүкендерінің бірінде бауырымен жорғалаушыларды ұстауға қатысты заң бұзушылық фактісі бойынша хабарлама келіп түскен.

«Табиғатты қорғау полициясының қызметкерлері дүкенде тексеру жүргізіп, онда сатушылардың ұстауға және сатуға рұқсаты жоқ үш ортаазиялық тасбақаны тәркілеген», – делінген хабарламада.

Ортаазиялық тасбақа осал түр ретінде Халықаралық табиғатты қорғау одағының қызыл тізіміне енгізілген, сонымен қатар жойылып кету қаупі төнген жабайы фауна мен флора түрлерімен халықаралық сауда туралы конвенциямен (СИТЕС) қорғауға алынғаны айтылды. Аталған факті бойынша оларға қатысты Әкімшілік құқықбұзушылық туралы кодекстің 389-бабы (Жабайы жануарлар мен өсімдіктердің түрлерін, олардың бөліктерін немесе дериваттарын заңсыз алу, өткізу, тасымалдау, әкелу, әкету, сақтау (ұстау)) бойынша әкімшілік іс қозғалды.