ҚР Мемлекеттік қызмет істері және сыбайлас жемқорлыққа қарсы іс-қимыл агенттігі Қорғаныс министрлігі құрылымында жиілеп тұрған парақорлыққа қатысты өз алаңдаушылығын білдірді.
Бұл туралы ҚР Сыбайлас жемқорлыққа қарсы іс-қимыл ұлттық бюросының баспасөз қызметі хабарлады.
Негізінен, әскери билет пен әскерге алынбайтындығы туралы қорытынды қағаз үшін пара берушілер өте көп.
Биылғы жылдың 9 айы ішінде Қорғаныс министрлігі қызметкерлеріне қатысты сотқа дейінгі 34 тергеу ісі тіркелген, бұл өткен жылғы көрсеткішпен салыстырғанда екі есе көп көрсеткіш.
Ұлттық бюро келтірген деректерге сүйенсек, бұл тергеу жүргізіліп жатқан істің 60 пайызы Қорғаныс министрлігінің Ақтөбе, Атырау, Қостанай облыстарындағы департаменттерінің басшылығына қатысты қозғалған.
Сол секілді әскери-техникалық мектептердегі де парақорлық мәселесі алаңдатарлықтай. Мұнда мемлекеттік сатып алуларды өткізу кезінде жүйелі түрде заңбұзушылықтар орын алуда.
Осыған сәйкес агенттік министрлікке ескерту жасады.