Самандар Қоқановтың туыстарының хабарлауынша, 24 қарашада Өзбекстан ІІМ Жазаны орындау бас басқармасының өкілдері 72 жастағы саясаткердің бостандыққа шыққанын хабарлаған.
Өзбекстанның экс-депутаты, Шыназдағы мұнай өңдеуші зауыттың бұрынғы директоры Самандар Қоқановтың түрме жазасы биыл 6 қазанда аяқталды. Ол темір торда 23 жыл төрт айын өткізді.
Қоқанов 1989 жылы Өзбекстанның Олий Кенгашына қазір президент қызметін уақытша атқарушы Шавкат Мирзиёевпен бір уақытта сайланған. Саясаткердің жақтастары оны Өзбекстанның алғашқы президенті Ислам Кәрімовтің жеке тапсырмасымен сотталғанын мәлімдеген еді.
Самандар Қоқановты адам құқығын қорғаушылар саяси тұтқын деп таныды, ол – тәуелсіз Өзбекстан тарихында түрмеде ең ұзақ отырып шыққан саяси тұтқын.