Олимпиаданың алғашқы күнінде қазақ спортшылары 5 ойын түрінен өнер көрсетеді

10-ақпан – Оңтүстік Кореядағы қысқы Олимпиада ойындарының ресми алғашқы жарыс күні. Байрақты бәсекеге қатысушылар 5 спорт түрі бойынша өзара мықтыны анықтайды.

Атап айтар болсақ, шаңғы жарысы, шорт-трек, конькимен жүгіру, трамплиннен секіру және биатлоннан медальдар жиынтығы сарапқа салынады.

Бір ерекшелігі, бұл 5 спорт түрінде де қазақстандық спортшылар бар. Әсіресе ел үлкен үміт артып отырған биатлоншылар жарыс жолына шығады. Олар – Галина Вишневская, Ольга Полторанина және Алина Райковалар.

Сонымен қатар Мәдіғали Қарсыбеков баптайтын шорт-трек шеберлерін де жеңіс тұғырынан көріп қалуымыз ғажап емес. Өйткені ұлттық құрама жігіттері Сочи Олимпиадасы мен әлем чемпионаттарында үздіктер қатарынан табылып жүр.