“Нұрлы жол” еліміздегі кіші авиацияның дамуына жаңаша серпін береді
Алдағы жылдары еліміздегі шағын қалалар мен ауыл-аймақ тұрғындары әуе арқылы қатынауға мүмкіндік алады.
Осы мақсатта елді-мекендердің әуе-жайлары жаңғыртылып, шағын ұшақтар қолданысқа беріледі деп хабарлады ҚР Инвестициялар және даму министрлігі Азаматтық авиация комитетінің баспасөз қызметі. Ілкімді іс «Нұрлы жол» бағдарламасының аясында жүзеге асырылады.
“Ішіне 20 жолаушы сиятын шағын ұшақтар 500 шақырымға дейінгі аумақтарға қатынай алады. Тиісінше, билет құны да қалтаны қақпайды. Осы жоба негізінде алдағы жылдары республика бойынша 16 аэродромды жаңғырту жоспарда бар. Оның 11-і тасжолды болса, қалғаны ұшып-қону аумағына жасанды қабаттар төсеу арқылы бір жолға қойылмақ” делінеді арнайы хабарламада.
“Қазір кіші авиация қарқынды дамып келе жатыр. Өткен жылдың өзінде 60 шақты шағын ұшақ тіркелді. Жеке меншікте ықшам ұшақтар да бар”, – дейді ҚР Инвестициялар және даму министрлігі Азаматтық авиация комитеті төрағасы орынбасарының міндетін атқарушы Тоты Әмірова.
Үлкен әуе көлігіндей бола қоймағанмен, тұрғындардың қатынауына қолайлы. Қазақтың жері кең-байтақ. Сондықтан кіші авиацияны да дамыта түскен жөн. Бұл экономиканың да қарыштауына септігін тигізбек.
050013, ҚР, Алматы қ., «Керемет» ықшамауданы, 7 үй, 39 корпус, 472 кеңсе