Пәкістан билігі “National Geographic” журналының басты бетіне шығып, әлемге танылған “ауған қызын” кепілге босату туралы шешім қабылдады.
Пәкістанның ішкі істер министрі Чоудри Нисар Әлиханның мәлімдеуінше: “Менің ойымша, біз оның жағдайына адамгершілік тұрғысынан қарауымыз керек, өйткені ол – әйел”.
Пәкістан билігі “ауған қызы” – Шарбат Гуланы – жалған төлқұжат қолданғаны үшін ұстады.
Гула 1985 жылы жазда “National Geographic” журналының Пешавардағы ауған босқындарының лагерінде дайындалған репортаждан соң әйгілі болды. Гула тұратын Пуштун ауылы совет әуе күштерінің соққысына ұшырады, Шәрбаттың әке-шешесі сол шабуылда қаза тапты. Гуланың суреті Ауғанстанға совет әскерінің басып кіруінен зардап шеккен босқындардың бейнесіне айналды.