Мектеп салуға бөлінген ақшаны ұрлап қашқан бизнесмен Чехияда ұсталды
39 миллион теңге жымқырған қазақстандық 11 жыл өткеннен кейін Чехиядан ұсталды, – деп хабарлайды ҚР Бас прокуратурасының баспасөз қызметі.
“Қазақстанның Бас прокуратурасы және ІІМ қызметкерлері қылмыстық жауапкершілікке тарту үшін Чехиядан Владимир Чаплинскийді экстрадициялады. Анықталған тұлғаны беру туралы Қазақстан Бас прокуратурасының тиісті сұрауын Чехияның Әділет министрлігі қанағаттандырды”, – делінген хабарламада.
Чаплинский 2007 жылы “Агат-7” ЖШС-нің директоры лауазымында болған кезінде, мемлекеттік мекемемен Балқаш қаласында мектеп салуға шарт жасасқан. Өзінің қызметін асыра пайдаланып, жұмыс актілеріне жалған мәліметтерді енгізіп отырған. Оған 39 миллион теңгеден астам қаржыны жымқырды деген күдік түскен.
Чаплинский қылмыс жасағаннан кейін қылмыстық тергеу органдарынан жасырынып жүргендіктен халықаралық іздеуде болған. Бас прокуратура оның елге берілу жұмыстарын 2011 жылдан бері жүргізіп келді. Қазіргі уақытта Чаплинский Астана қаласының тергеу изоляторына жеткізілді.
050013, ҚР, Алматы қ., «Керемет» ықшамауданы, 7 үй, 39 корпус, 472 кеңсе