Жақында ғана Мейрамбек Беспаев пен Сандуғаш Стамғазиваның орындауындағы “Сен болмасаң” әні Мөлдір мен Төреғалидың орындауында қайта жаңғыртылды. Екі әнге бейнебаян да түсірген әншілер ескі әндерді жаңартсақ дейді. Алайда, тыңдармандар Мейрамбектің орындауында естіп үйреніп қалғаннан болар, “жаңа” туындыға сын айтушылар қарасы көбейіп кетті.
Алайда, сын жауапсыз қалған жоқ. Мөлдір Әуелбекова тыңдаушылардың наразылығына жауап та беріп үлгерді.
«Сыни пікірлер айтып жатқандар өте көп. Көпшілік: «Мейрамбекке жете алмайсыңдар, ол кісілер сияқты айта алмайсыңдар» деп жазып жатыр. Біздің мақсат – аға-әпкелерімізден асып түсу емес.
Ол кісілер әбден жетеріне жеткізіп, орындап шыққан әншілер ғой. Біз сол ескі әндерді қайта жаңарттық. Қазіргі жаңадан өсіп келе жатқан ұрпақ ол әндерді білмеуі мүмкін ғой. Мейрамбек Бесбаев сияқты айта алмайтын да шығармыз», – деді Әуелбекова.
Қаржыға келгенде сараңданып қалатын Төреғали бұл жолы бнейнебаян қаражатын толықтай өзі көтеріп, жомарт бола қалыпты.
«Сол кезде Алтынбек Қоразбаевтың екі әнін қатар орындадық. Енді ескі ән болса да, есті ән деп ойлаймын. Сондықтан тамаша әндерді орындауға мен бірден келістім. Концерт аяқталған соң Төреғали: «Екі әнге бейнебаян түсірейік» деді. Барлығы сол Төреғалидың идеясы.
Қаржының барлығы Төреғалидың қалтасынан шықты», – дейді Мөлдір.
Бұл әнге білек сыбанып, кіріспес бұрын ән авторы Алтынбек Қоразбаевтың рұқсатын да алыпты. Енді аталмыш ән Төреғали мен Мөлдірдің репертуарында қалмақ.
«Мен орындамас бұрын рұқсат алу туралы бірден сұрадым. Төреғали ән авторы – Алтынбек Қоразбаевтан рұқсат алғанын айтты. Бұдан кейін тағы екінші ән бар. Ол ән де халықтың құлағына сіңіп қалған танымал туынды. Қолдан келгенше әнді жаңаша нұсқада шығаруға тырыстық», – дейді Мөлдір.
https://kaz.365info.kz/kyjeuim-shal-moldir-auelbekova-ashulandy-279989
Сонымен қатар, елді шулатқан Төреғалидың Павлодардағы оқиғасына да Мөлдір өз ойын білдірді. Әлі ұрыс-керіс болмаған дейді әнші.
«Төреғалимен жұмыс жасап жатқаныма екі айдан асты. Әзірге ешқандай жағымсыз ситуациялар болып жатқан жоқ. Біздің әріптестік қарым-қатынасымыздың соңы ұрыс-керіспен аяқталады деп ойламаймын. Ұрыс неден туындайды? Екі жақтың түсініспеушілігінен болады.
Біздің арамызда ондай келеңсіз жайттар болған жоқ. Болмайды деп ойлаймын. Қазір жұмыс жасап жатырмыз.
Ауыз толтырып айтатындай бұзық бала, жүріс-тұрысы дұрыс емес деп айта алмаймын.
Жұмысқа келеді, тапсырманы орындаймыз, қайтамыз. Бәрі жақсы», – деп сөзін қорытындылады Мөлдір Әуелбекова.