Мехикодағы Димаштың фанаттары қазақстандық дипломаттар арқылы сәлем жолдады (видео)

Димаш Құдайбергеннің мексикалық фан-клубының мүшелері қазақстандық дипломаттар қатысқан «Достық мәдениеттері фестиваліне» арнайы келген.

Мехико қаласында өткен «Достық мәдениеттері фестиваліне» жергілікті диаспоралардың және 93 елдің дипломатиялық миссия өкілдері қатысты, деп хабарлайды ҚазАқпарат ҚР СІМ баспасөз қызметіне сілтеме жасап.

Қазақстанның павильонын фестивальдің алғашқы күні Мексика астанасының мэрі Мехико Клаудия Шеинбаум келіп көрді.

«Павильонға келушілердің назарына ұлттық қолөнер туындылары, кәдесыйлар, еліміз туралы испан және ағылшын тіліндегі кітаптар ұсынылды. Телеэкранда қазіргі Қазақстан туралы видеороликтер, қазақ халқының мәдениеті мен болмысын паш еткен деректі фильмдер мен тарихи туындылар көрсетілді. Бір айта кетерлігі, фестивальде Димаш Құдайбергеннің Мексикадағы фан-клубы ерекше белсенділік танытып, отандасымыздың өмірімен тереңірек танысқанын атап өту керек», – делінген министрліктің хабарламасында.