Еуропаның бірқатар елдерінің төбесінен рутений-106 – радиациялық қалдығы бұлттармен көшіп өткен. Бұл жайтты қыркүйектің соңы мен қазан айының басында МАГАТЭ тіркеген. Еуропа ғалымдары бұл улы қалдықты Ресей немесе Қазақстан таратуы мүмкін деп болжам айтқан. Мұндай ауыр айыптан соң Қазақстан ресми түрде бұған қатысы жоқтығын мәлімдеп еді. Өз кезегінде Ресей де мұның мүмкін еместігін айтқан.
Алайда күні кеше Гринпис Россия агенттігі қыркүйектің соңында Росгидромет елдің аумағында ауаға рутения-106 улы қалдығының бөлінгенін тіркеген деп хабарлады.
Улы қалдық Оралдың оңтүстігіндегі Росатомға тиесілі «Маяк» комбинаты маңынан шыққан.
Бірақ «Росатом» мемлекеттік корпорациясы бұл фактіні жоққа шығаруда. Олардың айтуынша, Росгидрометтің 25-қыркүйек пен 7-қазан аралығында тіркеген мәліметтерінде рутений-106 Ресейдің ешбір территориясынан тіркелмеген, тек Санкт-Петербургтен басқасынан. Алайда Гринпис Россия агенттігіне берген Росгидрометтің дерегінде жағдай тіптен басқалай.
Алдында улы қалдықтың Қазақстаннан да шығуы мүмкін екендігі айтылып еді.
Рутений-106 — бұл қалыпты қоршаған ортада болмайтын техногенді радионуклид. Оның кішкентай бөлігінің ауаға таралуы апатты боп саналады.
Росгидромет қыркүйектің соңы мен қазанның басында ауаға тараған улы қалдықтың оңтүстік Оралдан Жерорта теңізі арқылы, одан соң солтүстік Еуропаға кеткенін де растап отыр. Алдында мамандар ауа массасының бұлай қозғалуы мүмкін еместігін айтып еді.
Мамандар металды балқытуға арналған пешке түсу арқылы улы заттың ауаға шығуы ықтималдылығын болжады.