Мемлекеттер – әртүрлі айдындар мен суларда жүзіп бара жатқан кеме, қайықтарға ұқсайды. Бірі, мұxит толқындарын қақ жарған алып кеме секілді. Кеудесін кере шалқып, кең дүниеге дабысын жеткізіп, дегенін өткізіп отырады. Жолына кесе-көлденең тұруға болмайды, қақыратып өте шығады.
Барлық жүйесі автоматтандырылған, қай маусымда, қайда кетіп бара жатқаныңды байқамайсың да. Ішкі жағдайдың жайлылығынан сапарда екеніңді ұмытып, өзіңді қауіпсіз мекен, мүлгіген тыныштықта жүргендей сезінесің. Кеменің алыптығы мен жүйенің беріктігі сондай, кеме капитанының бар-жоғын, білікті-біліксізін, ауысқан-ауыспағанын да байқамайсың. Тіптен, түбі тесіліп су кіріп жатса да, таудай мұзға соғылудың алдында тұрса да, қатер тұмсығыңның түбіне төніп келмей ештеңе сезбейсің. Жаның сүйсінген комфорт пен жүрегіңді баураған сиқырлы атмосфераның ауанында тербеліп кете бересің… Енді біреулері- өзен өрлеген шағын кемелер іспеттес. Жолы белгілі, бағыты айқын.
Өз бағытыңды өзің таңдамақ түгілі, тасқа соғылмай, аударылып түсіп, апат болмай аман сақталсаң, соған да қатты риза боласың. Ондай ескекті қолға ұстаған жанның қарымы қатты, жүрегі тәуекелшіл, ақылы алысты байқағыш болады. Сарқыраған көбікті суға бір батып, бір шығып, ұрынбай өткен қой тасқа қорқақтай қарап, алға жылжисың. Өзеннің жайпақтау жеріне жетіп, жайлы қайыққа жайғасып мінгенше, артында отырған алдындағыға, алдындағы артында отырғанға кедергі келтірмей, керісінше тепе-теңдік пен ортақ үйлесімді сақтауға тырысады. Оны сақтамағандардың, көбінде, қайығы орта жолда төңкеріліп, діттеген жеріне жете алмай титықтайды… Келесілерінің тағдыры тіптен аянышты. Тартылған теңіздің орынында қауқиып құр қаңқасы қалған, ішіне ит-құс дәрет сындырып, қыбырлаған жәндік қиын қалдырған кеме мен қайықтар да бар. Атызда аңтарылып, қойын-қонышында сыңсыған жел улеп, жер бауырлап жатқан ондай кемелердің бір кездері, ақ айдында желкені желбіреп, жал-жал толқынды жарып кетіп бара жатқан “қуатты күш” болғанына сенгің келмейді… Алла біздерді панасына алғай!!!
Шуақты елде қуатты мемлекет құрып, екі дүниенің игіліне қол жеткізе берейік! Тәуелсіздік тойы құтты болсын, ағайын!!!
Мұхамеджан Тазабеков,
Facebook парақшасынан алынды