Ұлттық банк еліміздегі жеке төлем ұйымдарын есепке алатын болады. Бүгін Мәжілістің жалпы отырысында ҚР Ұлттық банктің төрағасы Данияр Ақышев осылай мәлім етті, – деп хабарлайды inform.kz.
Ұлттық банк басшысының айтуынша, бүгінгі таңда Қазақстанның төлем нарығында жаңа банктік емес ойыншылар шығып, жаңа буын төлем қызметтері пайда болып жатыр. Халықаралық стандарттардың енуі нәтижесінде, төлем жүйесінің тәсілдері де өзгеріске ұшыраған. Ал қолданыстағы заңнамалық база төлем нарығын және оның барлық субъектілер қызметін жүйелік реттеуді қамтамасыз етпейді.
– Ақша төлемі мен аударымдары туралы қолданыстағы заң банк пен оның клиенттеріі арасындағы қарым-қатынастарды ғана қамтиды, төлемдер мен ақша аударымдарын жүзеге асыру рәсімдерін регламенттейді. Дегенмен төлем нарығының жұмыс істеуі саласында құқықтық негізді құру және қарым-қатынастарды кешенді реттеу, сондай-ақ төлемдер мен ақша аударымдар рәсімдері бойынша нормаларды жетілдіру мақсатында жаңа заң жобасын әзірлеу қажеттілігі туындады, – дейді Ұлттық банк төрағасы.
Оның айтуынша, заң жобасында төлем жүйелерінің жұмысы регламенттеледі. Бұл ретте халықаралық стандарттарға сәйкес, төлем жүйелері жіктеліп, төлем қызметінің нарығы реттеледі.
– Сосын заң жобасы нарықтың субъектілік құрамын айқындайды. Төлем қызметтерін жеткізушілердің ұғымы мен санаттарын енгізеді, олардың қызметтерін реттеу режимін, сондай-ақ олар көрсететін төлем қызметтерінің түрлерін айқындайды. Бұған байланысты Ұлттық банк жеке төлем ұйымдарын есептік тіркеуден өткізетін болады, – деді Данияр Ақышев.