Қазақ тіліндегі латын алфавитінің екінші нұсқасы да қоғамдық талқыға салынуы керек. Мемлекет басшысының бұл парасатты пайымы асығыстыққа жол берілмейтінін аңғартты, деп жазады 24.kz.
Ерден Қажыбек, А.Байтұрсынұлы атындағы тіл білімі институтының директоры:
– Қосар дыбыстар бойынша, шынында, жұртшылық тарапынан көп сұрақтар туындағаны рас. Сондықтан елге бір жеңілдеу жолмен төл дыбыстарды таңбаласақ, деген ұсыныс ұсынылып отыр. Бұл дәйекше түріне А.Байтұрсынов та ерекше назар аударған. Елбасы айтқандай, біз қазір талқылап жатырмыз, әлі де талқыланады.
Білім және ғылым министрлігі де әліпбидің нақты нұсқасы қабылданған соң ғана оны енгізу жұмыстары кешенді түрде жүргізілетінін хабарлады.
«Ол үшін мұғалімдер де арнайы курстан өткізілуі мүмкін»,
– дейді жауапты сала басшысы.
Ерлан Сағадиев, ҚР Білім және ғылым министрі:
– Енгізу кестесін депутаттармен ақылдасып, халықпен ақылдасып барып, Елбасыға көрсету керек. Әрі қарай, бәрі бір келісімге келсе, латын графикасы арқылы жұмыстарды жалғастырамыз. Ең алдымен, мұғалімдерді дайындаймыз. Мұғалімдер жеткілікті болғанда, жұмыстарды бастаймыз.