Құлжа тас жолындағы қойманы пайдаланып жүрген Әсемгүл Әдісқызы құжатсыз және тауарсыз қалған.
Бұл туралы оның өзі айтты.
Әсемгүлдің айтуы бойынша өрт таңғы сағат бесте “Анкара” қоймасынан шыққан.
“Менің ұлым сол қоймада түнгі кезекте, арба сүйреп жұмыс істейді. Мен жылап жүгіріп жүріп баламды іздедім. Қоймада балалардың кеңсе тауарлары мен құжаттарым сақталған болатын. Бәрі жанып кетті.
Менің сегіз балам бар, пәтер жалдап тұрамын. Құжаттарымды жақында жасатқанмын, бәрі сонда қалып қойды. Зейнетақы алмаймын, күйеуім де жұмыс істемейді. Тауарды несиеге алғанмын енді оны қалай жабамын”,
деп зар жылайды көпбалалы ана.
17380 шаршы метрге жайылған алапат өртті тікұшақпен жоғарыдан 44 рет 132 тонна су құйып жатып, сағат 10.46-да әрең сөндірген.
Қою түтін мен өрт шыққан орында су болмағандықтан өртті сөндіруде біраз қиындық туындаған. Суды 3 шақырым жерден алты цистернамен әкелуге тура келді.