Кішігірім дәмханалар мен шаштараздар СЭС бақылауынан шығарылды
50 орыннан кем қоғамдық тамақтану орындары мен аумағы 50 ш.м. кем сауда нысандары ҚР ДСМ Қоғамдық денсаулық сақтау комитетінің бақылауынан шығарылды, деп хабарлайды Baq.kz тілшісі.
«50 орыннан кем қоғамдық тамақтану орындары мен аумағы 50 шаршы метрден кем сауда нысандары бақылаудан шығарылды. Дәмхана, мини-кафе, нан өнімдерін сататын дүңгіршектер, бистро секілді ұсақ нысандар эпидемиологиялық маңызы шамалы топқа жатқызылды. Сондай-ақ, олардың қатарына шаштараз, сән салондары, монша, сауналар да жатқызылады», – деді Жандарбек Бекшин.
«Эпидемиологиялық маңызы болмашы нысандар жылына 1 рет тексеріледі. Заң бұзушылық анықталса, нақты мерзімі көрсетілген санитарлық ұйғарым беріледі. Кейін жоспардан тыс тексеріс форматында заң бұзушылықтың жойылып-жойылмағаны тексеріледі», – деп атап өткен Бекшин осылайша тұтынушымен кері байланыс орнату көзделіп отырғанын айтты.
«Біз енді ұсақ нысандарды халықтан шағым түскенде тексереміз. Қазір бұл нысандармен профилактикалық жұмыс жүргізіліп жатыр. Бұған қоса, мұндай мекемелер өзін-өзі бақылауға көшуі керек», – деді комитет төрағасының орынбасары.
050013, ҚР, Алматы қ., «Керемет» ықшамауданы, 7 үй, 39 корпус, 472 кеңсе