Қызылордада 5 баласы бар әжей “Қарттар үйін” паналап отыр
Қызылордада «Қамқорлық» дағдарыс орталығы тағы бір зейнеткерге пана болды. 65 жастағы Төлеш Құйрықбаеваны балалары үйге сыйдырмапты. Қарт ана 45 жыл бойы күйеуінің мазағы мен соққысына шыдап келгенін айтады. Ал бүгінде бес бірдей перзенті оған қамқор бола алмай отыр.
Бұл туралы “Астана” арнасы хабарлады.
«Менің ешкімім жоқ, жетім өстім. Балаларым несие алып беруін өтінді, алып бердім. Үйдің шатырын ауыстыруға көмектес деді, солар бақытты болсыншы деп оған да жәрдемдестім. Ал енді олардың маған көмек беруге мүмкіндіктері жоқ. Бұл өмірде ешқандай қызық көрмедім. Бірақ біреудің үйін тазалап, көрпе тіксем де, аш қалмаспын», – дейді Төлеш апа.
Дағдарыс орталығы директорының сөзінше, өкінішке қарай, соңғы кездері қарт ата-анасынан баз кешетін адамдар көбейген. Көбінесе балалары егде жастағы кісілерді баққылары келмейді екен. Ал бүгінде облыстық қарттар үйін 160 қария күнелтіп отыр. Олардың арасында 101 қарттың балалары бар.
«Бұған дейін екі бірдей әже оңалту процедураларынан өтіп, естерін жиды, қалыпқа келді. Қазіргі уақытта тиісті мемлекеттік органдармен келісіп жатырмыз. Одан кейін үш әжейдің біреуі «Қарттар үйіне» жіберіледі. Мүмкін араларында жолы болып, үйіне қайтатындар да болатын шығар», – дейді «Қамқорлық» орталығының директоры Жандос Түсмағамбетов.
050013, ҚР, Алматы қ., «Керемет» ықшамауданы, 7 үй, 39 корпус, 472 кеңсе