Қытайдың Судьжоу қаласында 19 жастағы қазақстандық студент қыз 14-інші қабаттан құлап, қаза болды.
Қайғылы жағдайды ҚР СІМ баспасөз қызметінің басшысы Әнуар Жайнақов растады, деп хабарлайды ҚазАқпарат.
«Қазір бұл дерек бойынша Қытай полициясы тергеу жүргізіп жатыр. Пәкістанның екі азаматы ұсталды. Кейінірек олардың біреуі қолхатпен босатылды. Қайғылы жағдай туралы Шанхай қаласындағы Қазақстан Консулдығы анықтап білді. Олар қыздың туған-туыстарына хабар берді. Консулдық қызметкерлері қыздың ата-анасына Қытайдан қорғаушы табуға қол ұшын берді», – деді Әнуар Жайнақов.
Ер адамдар ішімдік ішіп, қыздарға қол жұмсай бастаған соң, олардың бірі пәтердің бір бөлмесіне қашып кіріп, есікті іштен жауып алған. Біршама уақыттан соң бөлмеден шыққан қыз құрбысының 14-інші қабаттан құлап кеткенін көрген.
ҚР СІМ баспасөз қызметі басшысының айтуынша, әзірге қыздың өзі секіріп кеткені, болмаса біреудің итеріп жібергені нақтыланған жоқ. Дегенмен, сот-медициналық сараптаманың нәтижесінде қыздың биіктіктен құлау салдарынан көз жұмғаны расталды. Сараптама сондай-ақ оның денесінде зорлық-зомбылық белгілері болмағанын көрсеткен.
«Шанхайдағы Қазақстан Консулдығы мен ҚХР-дағы Қазақстан елшілігі бұл мәселені өзінің тікелей бақылауына алды. Марқұмның денесі 25 желтоқсанда Қазақстанға жеткізілді. Оған ҚР елшілігі барынша көмек көрсетті», – деп атап өтті Әнуар Жайнақов.
Ресми өкілдің хабарлауынша, мерт болған қыздың құрбысы Судьжоудағы оқуын жалғастыруда.