Alibaba Group-тың негізін қалаушы, әрі Қытайдың бас байекеші енді 30 жылдан кейін интернеттің мұнайдан да маңызды болатынын айтыпты.
Миллиардер бұл туралы Мәскеуде өткен экономикалық форумда мәлімдеді.
— Болашақта бәрін интернет пен сандық технологиялар шешеді. Қазір жаһандану үрдісі барлық жерде бірдей жүріп жатқан жоқ. Әлемде, шамамен, 60 компания өзгелерден озық тұр, бірақ бұл әлемде жастар да өз орнын табуы тиіс.
Жақын арада әлемдегі барша халықтың 80 проценті интернетке қосылады,
біз осыны ескеруіміз керек. Бізге «Үлкен жиырмалық» емес, «Үлкен екіжүздік» керек. Электронды коммерция, электронды экономика шекараларды жояды. Ол АҚШ-та пайда бола ма, Қытайда, әлде басқа жерде пайда бола ма – маңызды емес. Ендігі жерде өндіріс жаңа жұмыс орындарын ашпайтын болады: жұмысты жасанды интеллект атқарады.
Ал адамдарға басқа іспен айналысу қажет болады. Мен болашаққа сеніммен қараймын. Енді балаларды ескі әдістермен тәрбиелей берген дұрыс емес. Машинамен жарысу мүмкін емес, біз жастарды басқаша оқыта бастауымыз керек, — деді Джек Ма.
Бірақ миллиардер «жоғары технологиялар бәрібір де адамның орнын баса алмайды», деп қосты.
— Біз адамдарға ұқсайтын роботтарды қанша жасасақ та, машина – машина болып қалады, адамдар – адам болып қала бермек. Адамдарда сенім, сезім мен құндылықтар бар, машиналарда ол жоқ. Біздің орнымызды роботтар басады дегенге өз басым сенбеймін, деп қосты ол.