Зымыраннан кейін шыққан өртте зардап шеккен Жезқазған тұрғынын дәрігерлер санавияциямен облыс орталығына жеткізді. Қарағандылық мамандар Вячяслав Тыцтың жағдайын әлі де ауыр деп отыр,-деп жазды КТК арнасы.
Ал тірідей жанып кеткен Юрий Хатюшинді жерлеу рәсімі ертең өтеді. Ол еңбек еткен ресейлік “Машинажасау ғылыми-өндірістік бірлестігі” корпарациясындағылар, жерлеу шығынын көтереміз депті.
Естеріңізге салсақ, маусымның 14 күні күндізгі сағат 4 шамасында Жезқазғаннан 60 шақырым жерге «Союз» зымыран тасығышының бөлшектері құлаған.
Күннің ыстығы мен қатты желден от тұтанып 10 мың гектер жер өртенді. Өрт сөндіруге келген “Роскосмосқа” қарасты мекеменің екі жұмысшысын от шарпыған. Бірі оқиға орынында тіл тартпай кетсе, екіншісі хал үстінде жатыр.
«Бүгін бірінші ота жасап, науқас терісінің қаншалықты күйік шалғанын тексердік. Денесінің 40 пайызы күйген. Етке тереңдеп кеткен күйіктер де көп. Алда тағы да бірнеше ота жасалады. Көптеген ем дом шаралары қажет.
Жанын аман алып қалу мүмкіндігі бар»,-дейді Қарағанды облыстық травмотология және ортопедия клиникасы директорының орынбасары Берік Төлеубаев.