Қостанайлық оқушы адам өмірін сақтайтын отқа төзімді материал ойлап шығарды
Қостанай қаласындағы №1 лицей-интернатының оқушысы Никита Белашов пен оның ғылыми жетекшісі, физика пәнінің мұғалімі Дмитрий Судоргин адам өмірін қорғауға бағытталған «Старлайт» атты ерекше отқа төзімді материал жасап шығарды.
Никитаның айтуынша, жаңа материалды өрт сөндірушілердің киімдері мен техникасын қаптауға қолдануға болады. Бұл өрт кезінде өлім мен күйік алу қаупін азайтып, жоғары температурадан жабдықтардың істен шығуын болдырмайды.
«Өрт – адам өміріне қауіп төндіретін тілсіз жау. Егер «Старлайт» материалынан пластиналар жасалып, оларды өрт сөндірушілердің жабдықтарына орнатса, бұл көптеген адамды аман алып қалуға көмектеседі», – дейді Никита Белашов.
Зерттеу барысында қалыңдығы небәрі 0,5 сантиметр болатын пластина 1000°C температурада тікелей отқа екі минут бойы төтеп бере алған. Осы уақыт ішінде материал ішкі жағында өмір сүруге қолайлы температураны сақтап тұрған.
«Біз тоқтап қалмай, материалдың құрамын жетілдіру жұмысын жалғастырамыз. «Старлайт» адам өмірін қорғауда нақты нәтиже көрсетіп отыр», – дейді ол.
Никита өз жобасын республикалық ғылыми байқауда қорғап, II орынға ие болды, сондай-ақ Ұлттық ғылым академиясында өткен Жас зерттеушілер форумында үздік нәтиже көрсетті. Бүгінде басқа өңірлердің зерттеушілері де «Старлайтқа» қызығушылық танытып, оны жылу оқшаулағыш материал ретінде өз жобаларында сынақтан өткізіп жатыр.
050013, ҚР, Алматы қ., «Керемет» ықшамауданы, 7 үй, 39 корпус, 472 кеңсе