Халықаралық кәсіподақ конфедерациясы Қазақстан билігінен Oil Construction Company (ОСС) мұнай компаниясының кәсіподақ басшылары Әмин Елеусінов пен Нұрбек Құшақбаевты босатуды талап етті. Бұл туралы Астанада осы ұйымның бас хатшысының орынбасары Яап Виенен мәлімдеді. Ол Астанада Бас прокуратураның, бірқатар министрліктің өкілдерімен кездесті.
Оның айтуынша, Қазақстан билігі алдағы бірнеше аптада райынан қайтпаса, олар ауқымды науқан бастауға мәжбүр болады. Яап Виененнің пікірінше, бұл елдің әлем алдындағы беделін түсіріп қана қоймай, қаржы қиыншылықтары да болады.
Нұрбек Құшақбаев пен Әмин Елеусінов биыл қаңтар айында Ақтаудан Астанаға жеткізілді. Оларға қылмыстық айыптаулар тағылып отыр. ОСС мұнай компаниясындағы аштық акциясы қаңтар айында екі аптаға созылды. Наразылық акциясына қатысушылар Қазақстанның тәуелсіз кәсіподағы конфедерациясын жоюға қарсы шықты.