Қазақстанда пневмонияға шалдыққандар көбейді

Биыл Қазақстанда өкпе қабынуына шалдыққандардың саны айтарлықтай өскен. Денсаулық сақтау министрлігінің мәліметінше, алғашқы жартыжылдықта елімізде пневмонияның 49 мың 704 жағдайы тіркелген.

Бұл былтырғы көрсеткішпен салыстырғанда 19,2 пайызға артық. Мамандар қалыптасқан жағдайды әлем бойынша омикрон штамының әлі де басымдық көрсетіп тұрғанымен байланыстырады.

Ал көршілес Ресейде COVID-19 өршіді. Өткен аптада коронавирусқа шалдыққандардың саны 30 пайызға артты. Бір жұманың ішінде дерттен 14 адам қаза тапқан. Ресейдің 59 аймағында аталмыш ауру түрінің таралуы байқалған. 5-11 тамыз аралығында осы диагнозбен 1100 адам ауруханаға жатқызылған.