Бүгінгі қазақы қоғамда аса «жыр» болып тұрған бір тақырып бар. Ол Қазақстандағы «гүленшілерге» байланысты әңгіме.
Әңгіменің әлқисасын мынадан бастаған жөн сияқты: Қазақстанда бүгінгі күні 27 қазақ-түрік лицейі жұмыс істеп тұр деседі. Сөз жоқ, онда оқитындар – еліміздің ең бір дарынды, алғыр балалары. Бұл лицейлердің жетістігі шаш-етектен. Бірақ, негізі, даудың басы осы мектептерден өріс алып отыр. Бір емес, екінші рет еліміздегі Түркия елшісі осы лицейлерге байланысты күмәнді әңгіме айтты. Айтқан әңгіменің астарына назар аударсақ,
бұл лицейлерге Түркияның түк қатысы жоқ. Оны қаржыландырып отырған, өткен жылы осы елде бола жаздаған мемлекеттік төңкеріске тікелей қатысы бар (ұйымдастырушысы) Фетхуллах Гүленнің қатысы болуы мүмкін екен.
Елшінің өткен жылғы айтқанын келтіретін болсақ, «Қазақстан мен Түркияның ресми билігінің қолдауымен ашылған жалғыз білім ордасы – Оңтүстік Қазақстан облысы Түркістан қаласындағы Яссауи атындағы қазақ-түрік университеті. Ал Қазақстандағы қазақ-түрік білім мекемелерінің Түркияның ресми билігіне еш қатысы жоқ».
Енді ғаламтордағы ресми ақпараттарға көз салатын болсақ, жағдай былай: «ҚТЛ-дың Түркияға еш қатысы жоқ, оның оқу саясаты қазақстандық және халықаралық білім стандарттарына сай жасалған. ҚТЛ қызметін қадағалайтын «KATEV» халықаралық қоры президент Н.Назарбаев пен Т.Өзалдың қолдауымен Қазақстан мен Түркияның білім беру саласындағы келісімінің негізінде құрылған. ҚТЛ өз оқушыларының жоғары білім деңгейін паш етті және елдегі білім беру ордалары ішінде үздіктердің қатарында. ҚТЛ-да 1 124 оқытушы жұмыс істейді, олардың 1 030-ы Қазақстан азаматтары (91,7%), Түркия азаматтары – 94 (8,3%)» (Бұл өткен жылғы дерек).
Бір еске сала кететін жайт, былтыр бұл қазақ-түрік лицейлері «Білім» инновация лицейі» деп атын өзгерткен. Айтқымыз келгені бұл емес. Басқа.
Неге екенін қайдам, Түркия елшісінің осы білім беру орындарына байланысты айтқанынан кейін бүкіл әлеуметтік желілер осы мәселені талқыға салуға кірісті. Бұған «ауыр артиллерия» – саясаттанушылар да кірісті.
Олар да Қазақстан «Гүлен ауруынан» ада деседі. Тіпті мемлекеттік араналар белгілі тұлғаларды шақырып, тікелей әңгіме де жүргізді. Сонда бұл не, ала-шапқын?
Әгәрәки ,ол оқу орындарының саясаты қазақстандық және халықаралық білім стандарттарына сай жасалса, өзімізге қараса, сонша сабылыстың, талқының қажеті қанша еді?
Әлде басқаша ма?
Ресми Анкара қайта-қайта бұ мәселені неге қозғап жатыр? Сұрақ көп, жауап мардымсыз. Сіз не дейсіз?
Айдар Төлеген