Қазақ өнерінің жарық жұлдызы дүниеден озды
Қазақстанның Халық әртісі, «Құрмет», «Парасат» ордендерінің иегері Құман Тастанбеков дүниеден озды.
Бұл ақпаратты М.Әуезов атындағы Қазақ мемлекеттік академиялық драма театрының баспасөз қызметі растады, деп хабарлайды ҚазАқпарат.
«Бүгін өкініштісі, Құман ағамыз дүниеден өтті. Қоштасу рәсімінің уақыты әлі белгіленген жоқ. Құман ағамыз 1969 жылдан бастап, М. Әуезов атындағы академиялық драма театрында қызмет етіп келген», – деді баспасөз қызметіндегілер.
Ол сахнада О.Бөкеевтің «Құлыным меніңдегі» – Жан, «Вьетнам жұлдызындағы» – Ұшқыш, Ә.Нұрпейісовтің «Қан мен терінде» – Тәңірберген, Ғ.Мүсіреповтің «Ақан сері-Ақтоқтысында» – Ақан, С.Мұқановтың «Шоқан Уәлихановындағы» – Шоқан, Т.Ахтановтың «Антында» – Сауран, М.Әуезовтің «Айман-Шолпанында» – Әлібек, Т.Ахтановтың «Жоғалған досында» – Естемесов, Ш.Айтматовтың «Ана-Жер-анасында» – Қасым, «Ақ кемесінде» – Құлбек, Е.Домбаевтың «Біздің кластың қыздарында» – Төлеген, Б.Мұқайдың «Өмірзаясында» – Цезарь, Ф.Эрвенің «Түлкі бикешінде» – Флоридор, Н.Хикметтің «Фархад-Шырынында» – Фархад сынды негізгі рөлдерді сомдады.
Актердің әншілік өнері де бар. Ол бірнеше спектакльде ән орындайды. Қазақстанның халық әртісі (1993), КСРО Кинематографистер одағының мүшесі (1991), Қазақстан Лениндік комсомол сыйлығы лауреаты (1976). «Құрмет» орденінің иегері (2008), ҚР Тәуелсіздік күніне орай, Алмалы ауданының әлеуметтік, экономикалық, қоғамдық, саяси өміріне қосқан үлесі, жоғары кәсіби біліктігі мен азаматтық белсенділігі үшін марапатталды.
050013, ҚР, Алматы қ., «Керемет» ықшамауданы, 7 үй, 39 корпус, 472 кеңсе