Қалмұханбет Қасымов Денис Теннің өліміне қатысты тергеу аяқталғанын айтты

25 қазан 2018, 12:04

Бұл туралы ішкі істер министрі Қалмұханбет Қасымов Парламент Сенатының пленарлық отырысында айтты, – деп хабарлайды Tengrinews.kz.

“Тергеуді аяқтадық. Бірақ іс материалдарымен танысу процесі әлі жүріп жатыр. Ол процесс аяқталған соң іс бірден сотқа жолданады.

Іс материалдарымен танысуға қанша уақыт керек десе де, ол олардың құқығы, (осы істегі фигуранттар – автор)”, – деді ІІМ басшысы.

Еске сала кетейік, 19 шілдеде Алматыда белгісіз біреулер Денис Тенді пышақтап кеткен болатын. Оқиға шамамен 15.00-де Құрманғазы мен Байсейітова көшелерінің қиылысында болған. Кейін қалалық ІІД өкілдері Денис Тенге автоұрылар шабуыл жасағанын мәлімдеді. Сөйтсек, спортшы ұрылардың үстінен түскен болып шықты.

Жанжал кезінде спортшының аяғына пышақ тиіп, көп қан жоғалтқан. Ол ауруханада көз жұмды. Кейінірек Құрманғазы мен Байсейітова көшелерінің қиылысында даңқты мәнерлеп сырғанаушы Денис Теннің құрметіне ескерткіш орнатылатыны хабарланған еді. Сондай-ақ, оған “Халық қаhарманы” атағын беру ұсынылған болатын.