Павлодар облысы Ақсу қалалық соты ҚР Қылмыстық кодексінің 106-бабы 1-бөлігі, яғни “Денсаулыққа қасақана ауыр зиян келтiру” бойынша қылмыстық істі қарады.
Бұл туралы Ақсу қалалық сотының баспасөз қызметі хабарлады.
22-шілдеде Ақсу қаласының тұрғыны мас күйінде үйіне келіп, алдынан шыққан әкесін сабап тастаған. Әкесі ұлына: „Неге жұмысқа орналаспай жүрсің, мына жүрісің не, бізге маза бермедің„ деп ұрысқан. Жігіт әкесінің сөзін жеке басын қорлау деп санап, онымен келіспейтінін айтып, әкесіне жұдырық ала жүгірген. Ол бірнеше рет әкесінің басынан, кеуде тұсынан ұрып, бірнеше қабырғасын сындырған.
Сот үкімімен әкесін сабаған азамат К. ҚР Қылмыстық кодексінің 106-бабы 1-бөлігі, яғни “Денсаулыққа қасақана ауыр зиян келтiру” бойынша үш жылға бас бостандығынан айырылды. Ол жазасын қауіпсіздік деңгейі барынша жоғарылатылған қылмыстық-атқару мекемесінде өтейді.
Сот үкімі заңды күшіне енген жоқ.