Келесі жылы орташа зейнетақы көлемі 71 мың теңге болады
2018 жылдың 1-қаңтардан бастап, Мемлекет басшысының тапсырмасына сай, қамсыздандырушы (солидарный) зейнетақы 8 пайызға өседі. Базалық зейнетақы басқа да жәрдемақы түрлері сияқты 6 пайызға көбейеді.
Бұл туралы ҚР Еңбек және халықты әлеуметтік қорғау министрі Тамара Дүйсенова облыстар және Астана, Алматы қалалары әкімдерінің орынбасарларымен, халықты әлеуметтік қамсыздандыру және жұмыспен қамту мәселелері жөнінде өткізген жиында мәлім етті.
Енді зейнетақының төменгі мөлшері келесі жылы 49 019 теңгені құрап, ал орташасы 71 333 теңгені төңіректемек.
“Қазіргі уақытта базалық зейнетақы зейнет жасына жеткендерге бәріне бірдей еңбек өтілін және зейнетақы жинағын қалыптастыруға қатысуды ескерусіз тағайындалады. Келесі жылдан базалық зейнетақы жүйеге қатысу өтіліне қарай берілетіні көзделуде. Осы орайда 1998 жылдан кейінгі жинақтаушы зейнетақы жүйесіне зейнетақы жарналарының түсу аралығы ғана есептілініп қоймай, 1998 жылға дейінгі де еңбек өтілі назарға алынатыны болжануда”, – деп түсіндірді Тамара Дуйсенова.
Мәселен, 20 жылдық еңбек өтілінде базалық зейнетақы ең төменгі күнкөріс деңгейінің 74 пайызын құраса, 30 жылда 94 пайызды межелемек. Заңда айқындалғандай, 33 жылды еңсерген өтіл белесінде базалық зейнетақы күнкөріс деңгейінің толық 100 пайыз көлемін қамтымақ. Өзін жұмыспен қамтыған тұрғындар қызметін реттеуде 2018-2019 жылдарға арналған Жол картасы жасалуда.
Естеріңізге сала кетейік, 2018 жылдың 1-қаңтарынан бастап, Елбасының “Ұлт жоспары – 100 нақты қадам” идеясы мен халыққа Жолдауынан туындайтын тапсырмаларды жүзеге асыру мақсатында әлеуметтік-еңбек саласын жаңғыртуға бағытталған кешенді шаралар жүзеге асады.
050013, ҚР, Алматы қ., «Керемет» ықшамауданы, 7 үй, 39 корпус, 472 кеңсе