Барлық білім беру орындары қашықтан оқуға көшкелі бері интернет желісінің кейбір ауылдарда әлі де болса жетпегені үлкен мәселеге айналды. Дәл осы олқылықтың бір ұшын әлеуметтік желілердің бірінде жас мұғалім айтып, білім министрлігіне жанайқайын жеткізді.
Білім министрі Асхат Аймағамбетовке өзінің басындағы қиындықтарын түсіріп видео жолдаған ұстаздың аты Майра Байболатова. Ол Алматы облысының орта мектептерінің бірінде қазақ тілінен сабақ береді. Қашықтан оқуға көшекелі бері туысының үйіне барып жұмыс істеуге тура келгенін айтып министрге үндеу жасады. Бұған aуылда интернеттің жоқтығы себеп.
“Түн ортасында көшеде жүруімнің себебі үйімде интернет жоқ. Менің үйімде Wi-Fi жоқ. Қазір міне, kundelik.kz-ке кіру үшін осылай ноутбугымды арқалап, осы ауылда тұратын сіңлімнің үйіне барамын. Ол қыз көпбалалы ана. Баламен улап-шуылдап, ноутбугымды арқалап жүріп жұмыс істеймін. Менің өзге үйге барып жұмыс істегенім, ол отбасының берекесін алғаным дұрыс емес. Бірақ амал не үйде интернет жоқ болған соң, ауылымда Wi-Fi жоқ болған соң осылай жүруіме тура келеді”, – дейді Майра Байбулатова.
Облыстық білім басқармасы Tengrinews.kz агенттігіне берген сұхбатында ұстаздың үндеуіне қатысты пікір білдірді. Журналистерді осы факт бойынша қызметтік тексеру жүргізіліп жатыр деп сендірді.
«Майра Байболатова Көксу ауданының Мұқыр ауылында жалдамалы пәтерде тұрады. Майра Байболатоваға уақытша пайдалану үшін мектептен моноблог берілді. Мұғалімнің өзінің ноутбугі мен смартфоны бар. Ауылда ұялы 4G-интернет жақсы жұмыс істейді.
Оның Instagram желісіндегі парақшасы мен оның видео жарияланымдары осыған дәлел бола алады. Материалдық жағдайы жақсы, аптасына 26 сағаттық жүктемесі бар. Өзінің жеке көлігі де бар.
Мұғалімнің видео-үндеуінің негізгі мақсаты — үй мәселесін шешу, жергілікті атқарушы органдардың назарын аударту. Бүгінгі күні жергілікті атқарушы органдар үйге қатысты мәселені шешуге уәде беріп отыр», — деді Алматы облыстық білім басқармасының басшысы.