Каспий жағалауы үш күн бойына өртке орануда

Атырау облысында “Ақ Жайық” мемлекеттік тарихи резерваты аумағында үш күннен бері қамыс пен қураған шөп жанып жатыр.

Бұл туралы ATPress.kz өңірлік басылымы жазады.

2 күн ішінде 8 гектар аумақтағы өртті ауыздықтау мүмкін болған, әлі 7 гектар жердегі от тізгін бермей жатыр. Өртті сөндіруге оның әр жерден бой көрсетуі әрі сөндірген соң қайта-қайта тұтанып кете беруі күрделік туғызуда.

Атырау облысы Төтенше жағдайлар жөніндегі департаменттің дерегіне сүйенсек, 5 мамыр күні таңертең кезекші қызметтің пультіне Еркінқала ауылы маңындағы Каспий жағалауында, резерваттың оңтүстік аумағында өрт шықты деген хабар келіп түскен. 7-мамырдағы ақпарат бойынша, өрттің аумағы 10 гектарды қамтиды. Оқиға орнында алты техника, жеке құрамның 14 адамы жұмыс істеп жатыр. 5 мамыр күні 3 гектар, 6 мамыр күні 5 гектар жер сөндірілген. Аумақ ұшатын аппараттың көмегімен барлануда.