Бүгін ҚР Қорғаныс министрі Иманғали Тасмағамбетов «Гвардейск» полигонына барды. Онда бірнеше күннен кейін Армия халықаралық ойындары-2016 шеңберінде үздік мергендер мен артиллерияшылар арасында халықаралық байқаулар басталады, деп хабарлайды BNews.kz.
«Ұйымдастырушылар бақылау мәселесінің маңыздылығын ұғынуы тиіс. Сондықтан, жұмысты барлық команданың қауіпсіздік шаралары мүлтіксіз сақталатындай етіп ұйымдастырғандарыңыз абзал», – деп атап өтті Иманғали Тасмағамбетов ұйымдастыру штабының алдында.
Сапар барысында қорғаныс ведомствосының басшысы жақында ғана оқу-жаттығу
барысында төтенше жағдай салдарынан зардап шеккен анголалық командадағы әскери қызметшілердің хал-жағдайын сұрады. Госпитальда оларға барлық қажетті білікті медициналық көмек көрсетілді. Қазіргі кезде зардап шеккендердің жағдайы тұрақты.
Армия халықаралық ойындары-2016 Қазақстанда 2 тамыз күні басталатынын естеріңізге сала кетейік.
13 елдің, яғни, Қазақстан, Ангола, Армения, Беларусь, Венесуэла, Зимбабве, Үндістан, Иран, Қырғызстан, Қытай, Моңғолия, Ресей және ОАР-дың әскери қызметшілерінен құралған командалар күш сынасады. Осы жылы халықаралық армия ойындары 23 аталым бойынша өтеді. Ресейлік команда барлық номинацияға қатысады. Қытай тарапы 22 ойында өнер көрсетсе, Қазақстан 21 номинацияда сынға түседі.